बार्सिलोना बराबरीमा रोकियो

२४, मंसिर च्याम्पियन्स लिग फुटबलको समुह चरणको अन्तिम खेलमा बार्सिलोना बराबरीमा रोकिएको छ । बुधबार राति भएको खेलमा बार्सिलोना बार्यर लेभरकुसनसँग १–१ को बराबरीमा रोकिएको हो । २० औं मिनेटमा लियोनल मेस्सीले गोल गर्दै बार्सिलोनालाई सुरुवाती अग्रता दिलाए । तर त्यो अग्रता तीन मिनेट भन्दा टिक्न सकेन । २३ औं मिनेटमा लेभरकुसनका हर्नान्डेजले बराबरी गोल फर्काए । त्यसपछि खेलमा दुवै तर्फबाट गोल हुन सकेन र खेल १–१ को बराबरीमा सकियो । बराबरीले बार्सिलोनालाई केही असर नगरेपछि लेभरकुसन भने समुह चरणबाटै बाहिरियो । १४ अंकसहित समुह विजेता बनेको बार्सिलोना यसअघि नै अन्तिम १६ मा पुगेको थियो । बुधबार राति भएको खेलमा बाटे बारिसोभलाई गोलरहित बराबरीमा रोकेको रोमा समुह उपविजेताको रुपमा अन्तिम १६ मा पुग्यो । लेभरकुसन बार्सिलोनासँग बराबरीमा रोकिनु रोमाका लागि फाइदा जनक बन्यो । रोमा र लेभरकुसनको समान ६ अंक नै भएपनि रोमा दोस्रो स्थानमा रहँदै अन्तिम १६ मा पुगेको हो । लेभरकुसनले अब युरोपा लिग खेल्नेछ ।