फियोरेन्टिना दोस्रो स्थानमा उक्लियो, नापोली पराजित

२१ मंङसिर– फियोरेन्टिनाले इटालियन सिरी ए फुटबलको दोस्रो स्थानमा उक्लिएको छ । आइतबार राति भएको खेलमा फियोरेन्टिनाले युडिनेजेलाई ३–० ले हरायो ।

घरेलु मैदानमा भएको खेलमा फियोरेन्टिनाका लागि २६ औं मिनेटमा मिलान बाडे, ६२ औं मिनेटमा योजिप इलिचिक र ८६ औं मिनेटमा ग्वोन्जालो राड्रिग्वेजले गोल गरे । जितपछि दोस्रो स्थानमा उक्लिएको फियोरेन्टिनाको १५ खेलबाट ३२ अंक भएको छ । पहिलो स्थानमा रहेको इन्टर मिलानको समान १५ खेलबाट ३३ अंक छ । यो सिजन राम्रो प्रदर्शन गरेको फियोरेन्टिनाले उपाधि दाबेदारीलाई बलियो बनाउँदै लगेको छ । फियोरेन्टिनाले सन् १९६९ यता उपाधि जित्न सकेको छैन ।

आइतबार राति नै भएको खेलमा नापोली बोलोग्नासँग ३–२ ले पराजित भयो । हारसँग नापोलीले शीर्ष स्थानमा उक्लिने मौका गुमाएको छ । तेस्रो स्थानमा झरेको नापोलीको १५ खेलबाट ३१ अंक भएको छ ।