मेसी ला लिगाका सर्वोत्कृष्ट

बार्सिलोना – बार्सिलोनाका स्टार लियोनल मेसी स्पेनिस ला लिगामा सन् २०१४ र ०१५ को वर्ष खेलाडी घोषित भएका छन्।

मेसीले वर्ष खेलाडीसँगै उत्कृष्ट स्ट्राइकरको उपाधिसमेत हात पारेका छन्। सोमबार राति भएको वर्ष खेलाडी घोषणामा मेसीले आफ्नै टोलीका लुइस स्वरेज र रियल मड्रिडका क्रिस्टियानो रोनाल्डोलाई पछि पार्दै उक्त उपाधि हात पारेका हुन्।

रोनाल्डोले गत सिजन ला लिगामा सर्वाधिक गोल गरे पनि उत्कृष्ट फवार्डको बाजी मेसीले नै मारे।उत्कृष्ट गोलरक्षकमा बार्सिलोनाका ब्राभो र प्रशिक्षकमा बार्सिलोनाकै लुइस एनरिक बनेका छन्।

उत्कृष्ट रक्षकको उपाधि रियल मड्रिडका सर्जियो रामोस र उत्कृष्ट मिडफिल्डरको उपाधि जेम्स रोड्रिग्वेजले जिते। बार्सिलोनाका नेमार ला लिगामा उत्कृष्ट अमेरिकन खेलाडी घोषित भए। बार्सिलोनाले अघिल्लो सिजनमा ला लिगा र च्याम्पियन्स लिगसहित तीनवटा उपाधि जितेको थियो।

यसैगरी विश्व फुटबल महासंघ ९फिफा० ले सोमबार सार्वजनिक गरेको फिफा वर्ष खेलाडी पुरस्कारका लागि मेसी, नेयमर र पछिल्ला दुईपटकका विजेता क्रिस्टियानो रोनाल्डो अन्तिम मनोनयनमा परेका छन्। पोर्चुगलका रोनाल्डोले पछिल्ला दुईसहित तीनपटक अवार्ड जितिसकेका छन्।

मेसीले यसअघि चारपटक उक्त अवार्डमा कब्जा जमाएका थिए। नेमारले भने मनोनयनमै पहिलोपटक स्थान पाएका हुन्। अवार्ड वितरण आगामी जनवरी ११ तारिखमा जुरिचमा हुनेछ।