पशुपति दर्शनमा पुगे सोनु निगम

काठमाडौं– सांगीतिक कार्यक्रमका लागि नेपाल आइपुगेका भारतीय गायक सोनु निगमले विहीबार पशुपतिनाथ मन्दिर दर्शन गरेका छन् । प्राप्त तस्वीरमा उनलाई मन्दिर दर्शनपछि फर्किंदै गरेको देख्न सकिन्छ ।

उनीसँगै हास्य कलाकार सन्दीप क्षेत्रीसहित आयोजक सदस्यहरू छन् । गायक निगम त्रिभुवन अन्तर्राष्ट्रिय विमानस्थलमा उत्रिएदेखि मन्दिर दर्शनसम्मको कार्यक्रममा क्षेत्रीको सक्रियता देखिन्छ । उनले आयोजक टीमसँगै मिलेर काम गरिरहेका छन् ।

प्रहरी सुरक्षाबीच मन्दिरमा पुगेका गायक निगम ब्याण्डका अन्य सदस्यसहित पशुपति पुगेका थिए । उनलाई नेपाल टचले क्रिसमस कन्सर्टको लागि काठमाडौंमा ल्याएको हो । बुधबार बेलुका हायात रिजेन्सीको चौरमा भव्य सांगीतिक प्रस्तुति दिएका थिए जहाँ १० हजार दर्शक सहभागि रहेको आयोजकको दावी छ ।

काठमाडौं कन्सर्टमा निगमले आफूले गाएका चर्चित नेपाली र हिन्दी गीतमा दर्शकलाई मनोरञ्जन दिए । निगम विहिबार बेलुका दिल्ली फर्किँदैछन् । दिल्लीमा उनले अंग्रेजी नयाँवर्ष २०२५ को कन्सर्टमा प्रस्तुति दिने जनाइएको छ ।