२०८४ सालको चुनावमा सबै राजनीतिक दललाई पराजित गर्ने सभापति लामिछानेको दाबी

काठमाण्डौ – राष्ट्रिय स्वतन्त्र पार्टीका सभापति रवि लामिछानेले २०८४ सालको चुनावमा सबै राजनीतिक दललाई पराजित गर्ने दाबी गरेका छन् ।

आज शनिवार ललितपुरमा आयोजित एक कार्यक्रममा सभापति लामिछानेले यस्तो बताए। उनले नयाँ दलका रूपमा २१ जना सांसद सदनमा आउँदा समेत कुनै पनि राजनीतिक दलले नागरिकका लागि काम नगरेको बताए । दिनदहाडै हत्या गर्नेहरूलाई संविधान दिवसका दिनमा मुक्ति दिएर नयाँ दल र नागरिकलाई के गर्नसक्छौँ गर भन्ने चुनौती दिएको उनको भनाइ छ । सभापति लामिछानेले आउने चुनावमा कुनै पनि दललाई एक सिट पनि जित्न नदिने दाबी गरे ।
उनले भने, ‘नयाँ दलका रूपमा २१ जना सांसद सदनमा आएका छन् । पालिकामा एक सय एक होनहार मानिस आएका छन् । तैपनि दिनदहाडै मान्छे काट्नेलाई संविधान दिवसका दिनमा मुक्ति दिएर ल के गर्न सक्छौँ भनेर हामीलाई ठाडै चुनौती दिए । भ्रष्टाचारका फाइल खोल्ने भन्दै तर्सिएर बन्द गरेका छन् ।
सभापति लामिछानेले नेपालीको सुनौलो भविष्य भन्ने दल र नेताहरूले आफ्ना मानिसका लागि सुनैसुनको महल खडा गरेको बताए ।