दिवाकर पाण्डेद्धारा भीमोदय माविमा १० लाखको अक्षय कोष स्थापना

धादिङको त्रिपुरासुन्दरी–६ गोलाङमा रहेको भीमोदय माध्यामिक विद्यालयमा स्थापना गरिएको अक्षय कोषको रकम विद्यालयलाई हस्तान्तरण गर्नुहुँदै दिवाकर पाण्डे र उनको परिवार । तस्बिर: शंकर श्रेष्ठ

धादिङ– धादिङको त्रिपुरासुन्दरी गाउँपालिका–६ गोलाङमा रहेको भीमोदय माध्यामिक विद्यालयमा १० लाखको अक्षय कोष स्थापना गरिएको छ ।

गोलाङ घर भई हाल अमेरिकामा बस्दै आउनुभएका दिवाकर पाण्डेको परिवारले स्वर्गीय पिता हिक्मत बहादुर पाण्डेको सम्झनामा ‘हिक्मत बहादुर पाण्डे–२०८०’ अक्षय कोष स्थापना गरिदिनुभएका हुन् । जन्मथलोमा रहेको विद्यालयको शैक्षिक गुणस्तर सुधार्ने र पढाईकै लागि गाउँ छोड्नुपर्ने बाध्यतामा पुगेका विद्यार्थीलाई गाउँमै टिकाइराख्ने उद्देश्यले आफ्नो कमाईबाट केही रकम छुट्याएर कोषमा स्थापना गरेको उनले बताए ।

‘विद्यार्थी भाई बहिनीहरु गाउँ छोडेर अन्यत्र जानुपर्ने स्थिति अहिले देखिएको छ, घर आगनकै विद्यालयबाट गुस्तरीय शिक्षा प्रदान गरेर उनीहरुलाई सहयोग पुर्‍याउने उद्देश्यले संस्थाको स्थापना गरेको हुँ’, एनआरएन अमेरिकाको सहकोषाध्यक्ष समेत रहेका पाण्डे भन्छन्–‘विद्यालय स्थापनाको लागि बुबाको भूमिका अहम थियो, यो अक्षय कोष उहाँको सम्मानको लागि पनि हो ।’
आफु देश बाहिर भएपनि जन्मथलोसँग जोडिएको भावनात्मक सम्बन्धलाई फेरी जोड्नका निमित्त पनि सहयोग गरिएको पाण्डेले बताए । विद्यालयबाट उत्कृष्ट भएर कुनै राम्रो विद्यालय/कलेजमा अवसर पायो भने उनीहरुका लागि आवश्यक सहयोग गर्न आफु तयार रहेको पनि उनले बताए । यो सुरुवात हो, निरन्तर अघि बढ्नेछ’, पाण्डेले भने ।

कोषमा जम्मा गर्ने दश लाख रकमको चेक हस्तान्तरण गर्न गोलाङ पुग्नुभएका पाण्डेकी धर्मपत्नी इन्दिरा सिंखडा, आमा युद्व कुमारी पाण्डे र दाजु ध्रुव पाण्डेसहित नेपालमा शिक्षकको जागिरे रहँदाका समकक्षी शिक्षकहरुलाई स्थानीयहरुले पञ्चेबाजासहित स्वागत गरेका थिए । विद्यालयका शिक्षक विद्यार्थीले पनि विविध सास्कृतिक कार्यक्रमनै गरेर अक्षय कोषका संरक्षक पाण्डेका परिवारलाई भव्य स्वागत गरेका थिए ।

विद्यालयमा अक्षय कोष स्थापनाले गरिबीले पैसा नभएकै कारण पढाई छोड्नुपर्ने बाध्यताका विद्यार्थीको शैक्षिक गन्तव्य सुनिश्चितता र शैक्षिक गुणस्तर बृद्धिमा पनि सहयोग पुग्ने भन्दै विद्यालयका शिक्षक अभिभावकहरु खुसी भएका छन् ।