नयाँ उपराष्ट्रपति चयनका लागि आज मतदान, परिणाम आजै आउने

काठमाडौं- नयाँ उपराष्ट्रपति चयनका लागि आज मतदान हुँदैछ । नयाँ बानेश्वरस्थित संघीय संसद् भवनको ल्होत्से हलमा बिहान १० देखि दिउँसो ३ बजेसम्म मतदान हुने संसद सचिवालयले जनाएको छ ।

उपराष्ट्रपति पदको निर्वाचनमा संघीय संसद् (प्रतिनिधिसभा र राष्ट्रियसभा) र प्रदेशसभाका सांसदले मतदान गर्नेछन् ।प्रदेशसभाका ५५० र संघीय संसद्का ३३२ मतदाता रहेका छन् ।

मतदानका लागि प्रदेश र संघीय सांसदहरूलाई छुट्टाछुट्टै मतदान केन्द्र तोकिएको छ । उपराष्ट्रपति निर्वाचनमा एक संघीय सांसदको मतभार ७९ र एक प्रदेश सांसदको मतभार ४८ गणना हुन्छ ।

निर्वाचनको सम्पूर्ण तयारी पूरा भएको र आज साँझ नै ६–७ बजेभित्रै परिणाम सार्वजनिक गरिने निर्वाचन अधिकृतले तयारी गरेका छन् । नेकपा एमालेबाट अष्टलक्ष्मी शाक्य, जनमत पार्टीबाट ममता झा, जनता समाजवादी पार्टी जसपाबाट रामसहायप्रसाद यादव र सोही पार्टीकी प्रमिला यादवले उमेदवारी दिएका हुन् ।

प्रमिलाले रामसहायलाई समर्थन गर्दै उमेदवारी निष्क्रिय भएको घोषणा गरिसकेकी छन् । तर, उमेदवारी फिर्ता लिने निधारित अवधिभित्र उनले उमेदवारी फिर्ता नलिएकाले मतपत्रमा उनको पनि नाम र छापिएको छ ।