एमाले र राप्रपाले प्रयोग गरे विद्युतीय भोटिङ मेसिन

काठमाडौ –

चितवनमा मंसिर १० देखि १४ गतेसम्म चलेको नेकपा एमालेको दसौं राष्ट्रिय महाधिवेशनमा विद्युतीय भोटिङ मेसिनको प्रयोग गर्दा मतपरिणाम दुईरतीन घण्टाभित्रै सार्वजनिक भयो।

१०० विद्युतीय भोटिङ मेसिनमध्ये महाधिवेशनमा ९० उपकरणका प्रयोग गरियो भने ४८ पदका लागि मतदान भएको थियो।

विद्युतीय भोटिङ मेसिनको प्रयोग गर्दा पार्टी निर्वाचन आयोगले मत्रपत्र छाप्न परेन भने एमाले महाधिवेशन प्रतिनिधिले भिन्नभिन्न मतपत्र बोकेर मतदान गर्नुपर्ने झन्झटबाट मुक्ति पाए।

एमालेले महाधिवेशनमा सफल यो अभ्यासलाई राप्रपाले गत शनिबार काठमाडौंको भृकुटीमण्डपमा चलेको महाधिवेशनमा प्रयोगमा ल्यायो, अध्यक्षबाहेक पदाधिकारी र केन्द्रीय सदस्यका लागि विद्युतीय भोटिङ मेसिनमै मतदानको व्यवस्था गरिएको थियो।

एक सय वटा विद्युतीय भोटिङ मेसिनमध्ये ९१ वटा प्रयोग गरिएका थिए। यो विद्युतीय भोटिङ मेसिनबाट मतदान गर्न समय कम लाग्छ भने मतपरिणाम पनि छिटो आउँछ। एक महाधिवेशन प्रतिनिधिले १५/२० मिनेटमै मतदान गरिसक्छन्।

नेपाली कांग्रेसले यही मंसिर २४ देखि २७ गतेसम्म काठमाडौंको भृकुटीमण्डपमै महाधिवेशन गर्दैछ। २९ मतपत्र हुने भएकोले एक जना महाधिवेशन प्रतिनिधिलाई कम्तीमा ४५ मिनेट मतदान गर्न नै समय लाग्ने कांग्रेसकै नेताहरू बताउँछन्।

कागजी मतपत्र छाडेर विद्युतीय भोटिङ मेसिन प्रयोगमा जानेबारे कांग्रेसले अझै निर्णय गरेको छैन।