मेस्सीको नाम भएको टिसर्ट पाएपछि पाँच वर्षिय फ्यान दंग

१४ फागुन, धादिङ – अर्जेन्टिनी फुटबलर लियोनल मेस्सीका पाँच वर्षिय फ्यान निकै दंग परेका छन् । कारण हो आफुलाई मन पर्ने खेलाडी मेस्सीले आफ्नो नाम भएको टिसर्ट उपहार दिनु ।

यसअघि मेस्सीका फ्यान अफगानी बालक मुर्तजा अहमादीले प्लाष्टिकलाई मेस्सीको जर्सी बनाएर लगाएका थिए । उनको यो तस्बिर सामाजिक सञ्जालमा निकै चर्चित बनेको थियो । प्लाष्ट्रिकलाई जर्सी लगाएर विश्वव्यापी चर्चामा आएका अफगानी बालक मुर्तजा अहमादीले मेसीबाटै टिसर्ट पाएका छन् ।

अफगानिस्तानका ५ वर्षीय बालक मुर्तजा अहमादीलाई मेस्सीले आफ्नो हस्ताक्षर सहितको टिसर्ट र फुटबल उपलब्ध गराएका हुन् । मुर्तजालाई सुरुमा इराकी बालक भनेर प्रचारित गरिएको थियो । उनको तस्वीर प्रकाशित भएपछि खोजी गर्दा उनी अफगानी बालक भएको पत्ता लागेको हो ।

संयुक्त राष्ट्रसंघीय बालकोष युनिसेफले बालक मुर्तजा अहमादीको तस्विर पोष्ट गरेको छ । जसमा उनले मेस्सीको हस्ताक्षर भएको टिसर्ट लगाएका छन् । मुर्तजा अहमादीका पितालेले छोरालाई यो उपहार कहिल्यै खरिद गर्न नसक्ने बताएका छन् ।
( एजेन्सीको सहयोगमा)