यस वर्षको एसएलसी परीक्षा चैत १८ गतेदेखि

१ पुस, भक्तपुर । यस बर्षको एसएलसी परीक्षा चैत १८ गते देखि शुरु हुने भएको छ । बुधबार बसेको माध्यमिक शिक्षा उत्तीर्ण परीक्षा समितिको बैठकले चैत १८ देखि २९ गते सम्म परीक्षा गर्ने निर्णय गरेको हो । यसअघि चैत पहिलो हप्तादेखि नै एसएलसी परीक्षा सुरु हुने गर्दथ्यो ।

तय भएको परीक्षा तालिकाअनुसार १८ गते पहिलो दिन अनिवार्य अंग्रेजी विषयको परीक्षा हुनेछ । १९ गते अनिवार्य नेपाली, २१ गते अनिवार्य गणित र २२ गते विज्ञान विषयको परीक्षा हुनेछ ।

यसैगरी २३ गते सामाजिक शिक्षा, २४ गते स्वास्थ्य जनसंख्या तथा वातावरण शिक्षा, २५ गते ऐच्छिक प्रथम, २६ गते द्वितीय ऐच्छिक विषयको परीक्षा हुने परीक्षा नियन्त्रक खगेन्द्र नेपालले जानकारी दिए । प्राविधिक तर्फका परीक्षा भने २९ गतेसम्म चल्ने छ ।