तीनकुने घटना : नेकपा एकिकृत समाजवादीद्धारा प्रधानमन्त्रीलाई ज्ञापनपत्र

धादिङ । चैत १५ गते भएको तीनकुने घटनाको विषयमा नेपाल कम्युनिष्ट पार्टी (एकिकृत समाजवादी)ले सोमबार प्रधानमन्त्रीलाई ज्ञापनपत्र बुझाएको छ ।

समाजवादी मोर्चाले आयोजना गरेको कार्यक्रम असफल पार्ने कुत्सित मनसाय राखेर योजनाबद्ध रुपमा कार्यक्रम जुधाई कथित राजावादी समूहले विध्वंसात्मक, अराजक घटना गराएको भन्दै देशभरबाट प्रमुख जिल्ला अधिकारी मार्फत प्रधानमन्त्रीलाई ज्ञापनपत्र बुझाएको हो ।

नेकपा एकिकृत समाजवादी धादिङले जिल्ला प्रशासन कार्यालय धादिङका प्रमुख जिल्ला अधिकारी सुमन घिमिरेमार्फत प्रधानमन्त्री केपी शर्मा ओलीलाई ज्ञापनपत्र पढाएको छ । ज्ञापनपत्र बुझाउने क्रममा नेकपा एसका पोलिटव्युरो सदस्य गुरु प्रसाद बुर्लाकोटी, केन्द्रिय सदस्य सुवास खतिवडा, इन्दिरा ढुंगानालगायत नेता कार्यकर्ताहरु सहभागी थिए ।

गणतन्त्र स्थापनाका एकिकृत समाजवादी पार्टीले खेलेको भूमिकाबाट विचलित रहँदै आएका तत्वहरुले आलोकनगर स्थित पार्टी केन्द्रीय कार्यालयलाई केन्द्रित गरी योजनाबद्ध आक्रमण, तोडफोड, लुटपाट र आगजनी गरेको ज्ञापनपत्रमा उल्लेख छ ।

अराजक भिडले तिनकुने, कोटेश्वर, बालकुमारी र जडिबुटी क्षेत्रमा जनताको नीजि घर सम्पत्ति, पसल, सुपर मार्केट, कार्यस्थल, राष्ट्रिय औद्योगिक प्रतिष्ठान (जडिबुटी औषधि प्रशोधन केन्द्र), संचार माध्यमका कार्यालय, सवारी साधन, नीजि तथा सरकारी यातायातका साधनहरू तोडफोड गर्ने तथा जलाउने, लुटपाट मच्चाउने, पत्रकारलाई ज्यूँदै जलाउने जस्ता अराजक तथा हिंसात्मक घटनाको एकिकृत समाजवादीले भ्रत्सर्ना गरेको छ ।

‘चैत्र १५ गतेको आपराधिक घटनामा संलग्न व्यक्तिहरू र तिनका मतियारहरूलाई कानुन बमोजिम कडाभन्दा कडा सजाय गर्न, घाइतेहरूको निशुल्क उपचार गर्न, घटनामा ज्यूदै जलाइएका एभिन्युज टेलिभिजनका पत्रकार सुरेश रजकलाई सहिद घोषण गर्न, क्षति भएका सम्पत्तिको क्षति पूर्ति गर्न, हिंसा र अराजक गतिविधिहरूलाई नियन्त्रण गर्न, नेपालको संविधानको संरक्षण र नागरिकको ज्युज्यान तथा सम्पत्तिको सुरक्षा गर्न जोडदार माग गर्दछ’, ज्ञापनपत्रमा उल्लेख छ ।

मोर्चाले आयोजना गरेको कार्यक्रममा लाखौंको जनसागरको उपस्थितिले तथाकथित राजावादी, दरवारिया र अराजकतावादीहरूको मुटु हल्लाएको नेकपा एकिकृत समाजवादीका नेता गुरु प्रसाद बुर्लाकोटीले बताए ।

नेपाल कम्युनिष्ट पार्टी (एकीकृत समाजवादी), नेपाल कम्युनिष्ट पार्टी (माओवादी केन्द्र), नेपाल कम्युनिष्ट पार्टी र नेपाल समाजवादी पार्टी समेत चार राजनितिक दल आवद्ध समाजवादी मोर्चा, नेपालद्वारा २०८१ चैत्र १५ गते काठामाण्डौको भृकुटी मण्डपमा बृहत् जन प्रदर्शन तथा विशाल जनसभाको आयोजना गरिएको थियो । सोही दिन राजावादीहरुले तीनकुनेमा विरोधसभा आयोजना गरेको थियो ।