राजावादी आन्दोलन :ज्ञानेन्द्रको उक्साहटमा हिंसात्मक बने राजावादी

काठमाडौं – पूर्वराजा ज्ञानेन्द्र शाहको अपिलअनुसार अगाडि बढेको राजावादी गतिविधि हिंसात्मक र अराजक बनेको छ ।

विवादित व्यापारी दुर्गा प्रसाईं कमान्डर बनेर तीनकुनेमा शुक्रबार निस्किएको राजावादी प्रदर्शन हिंसात्मक र अराजक बन्न पुगेको हो । प्रदर्शनकारीको अराजकता र प्रहरीको प्रतिवादका क्रममा शुक्रबार साँझसम्म दुई जनाको मृत्यु भएको छ ।

प्रदर्शनको भिडियो खिच्न बसेको घरमै प्रदर्शनकारीले आगो लगाउँदा एभिन्यूज टेलिभिजनका पत्रकार सुरेश रजकको मृत्यु भएको हो । गृह मन्त्रालयका सहसचिव छविराज रिजालका अनुसार प्रदर्शनकै क्रममा कीर्तिपुरका २९ वर्षीय सुविन महर्जनको मृत्यु भएको छ ।

प्रहरीको प्रारम्भिक सूचनाअनुसार कम्तीमा २२ जना घाइते भएका छन् । ठूलो संख्यामा भौतिक संरचनामाथि तोडफोड र आगजनी भएका छन् । स्थिति सामान्य अवस्थामा फर्काउन गृह प्रशासनले कोटेश्वर, तीनकुने क्षेत्रमा कर्फ्यु जारी गरेको छ ।

मानव अधिकार आयोगले प्रदर्शन हिंसात्मक बनेको निर्णय सार्वजनिक गरेको छ । ‘कुनै पनि बहानामा हिंसात्मक गतिविधि र अरुको अधिकारको उपभोगमा अवरोध गर्ने कार्य स्वीकार गर्न सकिँदैन,’ आयोगले भनेको छ, ‘यस प्रकारका हिंसात्मक कार्यमा संलग्न जोकोहीलाई कानुनी दायरामा ल्याई कारबाही गर्न आयोग सरकारलाई आग्रह गर्दछ ।’