अरविन्द र जोसेफ बने हिमालय रोडिजका फाइनलिस्ट, कसले जित्ला उपाधि ?

काठमाडौं -हिमालय रोडिजको छैटौं सिजनले सोमबार विजेता प्राप्त गर्नेछ । टीम अनुपविक्रम शाही र टीम लाउरेका दुई प्रतिस्पर्धी फाइनलिस्टको रुपमा उपाधि जित्ने होडमा छन् ।

टीम अनुपबाट जोसेफ शर्मा र टीम लाउरेका अरविन चन्द ठकुरी फाइनलिस्ट हुन् । सोमबार राती ९ बजे हिमालय टिभी र युट्युवमा ९ः१५ बजे फिनाले एपिसोड स्ट्रिमिङ हुनेछ । नयाँ विजेतालाई लिएर दर्शकमाझ कौतुहलता ब्याप्त छ ।

विजेताले १० लाख नगदसहित शीर्ष प्रायोजक यामहाको तर्फबाट मोटरसाइकल र गिफ्ट ह्याम्पर प्राप्त गर्नेछन् । उपविजेताले १ लाख नगदसहित गिफ्ट ह्याम्पर प्राप्त गर्ने जनाइएको छ । सोमबार आयोेजना हुने विशेष समारोहमा पुरस्कार दिइने शोकी सहायक निर्देशक गरिमा तामाङले बताइन् ।

छैटौं सिजनमा १६ जना प्रतिस्पर्धीले सहभागिता जनाएका थिए । चुनौतिपूर्ण टास्क र प्रतिस्पर्धालाई छिचोल्दै जोसेफ र अरविन्द फिनालेमा पुगेका हुन् । यो सिजनमा अनुपविक्रम शाही, दीया मास्के, प्रियंका कार्की र आशिष राना लाउरे ग्याङ लिडरको रुपमा छन् । छैटौं सिजनलाई रेमनदास श्रेष्ठले होस्ट गरिरहेका छन् । सिमोस सुनुवार निर्देशक हुन् ।