थाइल्यान्डमा समलैंगिक विवाहलाई कानूनी मान्यता

A same-sex couple poses for pictures at a marriage registration event at Paragon shopping mall in Bangkok on January 23, 2025. A high-profile gay couple married in Thailand on January 23 as the kingdom's same-sex marriage law went into effect, an AFP journalist saw, among the first of hundreds expected to do so. (Photo by Chanakarn LAOSARAKHAM / AFP)

पूर्वी एशियाली देश थाइल्यान्डले समलैंगिक विवाहलाई कानूनी मान्यता दिएको छ । थाइल्यान्डमा लामो समयदेखि प्रतिक्षा गरिएको समान विवाह कानून आजदेखि लागू भएको बीबीसीले जनाएको छ ।

आज सयौं समलिंगी जोडीले विवाह दर्ता गराएका छन् । जिल्ला अधिकारीहरूले फोटो बुथ र निःशुल्क कप केकसहित पार्टीको आयोजना गरेका छन् । त्यहाँ विवाह दर्ता गराउनेहरू विभिन्न रंगका पोशाकमा सजिँदा उत्सवमय भएको खबरमा उल्लेख छ । विवाह दर्ता गर्ने पहिलो जोडीलाई हवाई टिकट पनि नि:शुल्क थियो ।

विश्व आर्थिक मञ्चमा सहभागी हुन स्विट्जरल्यान्डको डाभोसमा रहनुभएकी प्रधानमन्त्री पेतोङतार्न सिनावात्राले ‘थाइल्यान्डमा इन्द्रेणी झण्डा माथि उडिरहेको छ’ भनेर फेसबुकमा लेख्नुभएको छ । यस्तै थाइल्यान्डका पूर्वप्रधानमन्त्री श्रीथा टाविसिनले आफूहरू अमेरिकाभन्दा धेरै खुला विचारका भएको टिप्पणी गरेका छन् ।

गएको सेप्टेम्बरमा थाइल्यान्डका राजा महा वजिरालोङकोर्नले यो कानूनलाई अनुमोदन गर्नुभएको थियो । त्यसको १ सय २० दिनपछि यो कानून लागू भएको हो । थाइल्यान्डमा ‘एलजीबीटीक्यू प्लस’ अर्थात् यौनिक तथा लैंगिक अल्पसंख्यक समुदायको अधिकारलाई धेरै महत्त्व दिइन्छ ।

थाई सामाजिक अभियन्ताहरूले समलिंगी विवाहको अधिकारलाई मान्यता दिन एक दशकदेखि प्रयास गरिरहेका थिए तर देशमा राजनीतिक उथलपुथलका कारण यो कदम बारम्बार ढिला भइरहेको थियो ।

नयाँ विवाह कानूमा पुरुष, महिला, पति र पत्नीको सट्टा लैङ्गिक तटस्थ शब्द प्रयोग गरिएको छ । नयाँ कानूनमा तेस्रोलिंगीलाई पनि विवाह गर्ने अधिकार दिइएको छ ।