धादिङ साङ्कोषका विजय खनाल बचाउ अभियानमा ५८ हजार संकलन

धादिङ– दुबै मृगौला फेल भएर अस्पतालको शैयामा छटपटाइरहेका नीलकण्ठ नगरपालिका वडा नम्बर १२ का २२ वर्षीय बिजय खनालको उपचारमा सहयोग संकलन हुने क्रम जारी छ ।

उपचार गर्दागर्दै जायजेथा समेत सकिने अवस्था आएपछि विजयका छिमेकी र आफन्तहरुले विजय बचाउ अभियान नै चलाएर सहयोग संकलन सुरु गरेका छन् । आर्थिक सहयोग संकलन घरदैलो अभियान गरेर अस्पतालको बेडमा छटपटाइरहेका विजयका छिमेकी र आफन्तहरुले गाउँमा आर्थिक सहयोग संकलन अभियान चलाएका हुन् ।
सहयोग संकलनको क्रममा नीलकण्ठ नगरपालिका–१२ को धनसारपाखादेखि बडारेसम्मको घरदैलोमा ५८ हजार चार सय ७५ रुपैंया संकलन भएको विजय बचाउ अभियानकी गीता खनालले जानकारी दिइन् । घरदैलोमा भेटिएका दाताहरुबाट ५० रुपैंया, एक सय रुपैँया भन्दा माथी जो सकेको सहयोग संकलन भएको उनले जानकारी दिएकी छन् ।

पारिवारिक रुपमा अत्यन्तै कमजोर रहेको खनाल परिवारको सबै जग्गा जमिन विक्रि गर्दा पनि उपचारमा नपुग्ने अवस्था भएकोले बाध्य भएर आर्थिक सहयोग संकलन अभियान चलाइएको हो । दुबै मृगौला फेल भएकोले मृगौला फेर्नका लागि सहयोगको याचना गर्दै स्थानीय गिता खनालको संयोजकत्वमा ७ सदसिय बिजय खनाल बचाउ सहयोग समिति गठन गरेर गाउँबासीको तर्फबाट देश विदेशमा रहेका सबैलाई सहयोगको लागि आग्रह गरेका छन् ।

धादिङ अस्पतालमा हप्ताको २ दिन डायलासिस गर्ने गरेको विजयको मृगौला फेर्नु पर्ने र परिवारभित्रबाट मृगौला दिने मानिस भएपनि सो कामका लाग्ने खर्च पु¥याउन नसकेका कारण खनाललाई बचाउन सबै मिलेर लागिएको संयोजक गिता खनालले बताइन् ।

विजय खनाल बचाउ अभियान अन्तरगत राष्ट्रिय वाणिज्य बैँक धादिङ शाखाको खाता नम्बर २५८०१००७६७००५२०००००१ मा विरामी विजय खनाल र आमा मिना खनालको नाममा खाता संचालन गरिएकोले सम्पूर्ण देश विदेशमा बस्ने सबैलाई विजय खनाललाई बचाउन आग्रह गरिएको छ । थप जानकारीका लागि विरामीका आमा मिना खनालको ९८६१३४४७६३ मा सम्पर्क गर्न सक्नुहुने छ ।