अहिलेसम्मकै उच्च मूल्यमा पुगेको सुनको भाउ दुई दिनदेखि स्थिर

काठमाडौं – हालसम्मकै उच्च मूल्यमा पुगेको सुनको भाउ दुई दिनदेखि स्थिर रहेको छ । नेपाल सुनचाँदी व्यवसायी महासंघका अनुसार मंगलबार पनि प्रतितोला १ लाख २६ हजार रुपैयाँमा सुनको कारोबार भएको छ । यसअघि आइतबार र सोमबार पनि यहीं मूल्यमा सुनको कारोबार भएको छ ।

नेपाली बजारमा १६ महिनामा सुनको मूल्य प्रतितोला ३५ प्रतिशतले बढिसकेको छ । १७ कात्तिक २०७९ मा प्रतितोला ९३ हजार १ सय रुपैयाँमा सुनको कारोबार भएको थियो । विगत २६ दिनमा सुनको मूल्य ९ हजार ५ सय रुपैयाँ बढिसकेको छ । फागुन ३ गते सुनको भाउ तोलामा १ लाख १६ हजार ५ सय रुपैयाँ थियो । चाँदीको मूल्य भने १० रुपैयाँ बढेको छ । प्रतितोला १ हजार ४८५ रुपैयाँमा चाँदीको कारोबार भइरहेको छ ।