एमाले धादिङले तीन महिनाभित्र सबै वडा र पालिकाको अधिवेशन गर्ने

धादिङले –नेकपा एमाले धादिङले तीन महिनाभित्र जिल्लाका सबै वडा र पालिका कमिटिको अधिवेशन गरिसक्ने भएको छ । जेठ मसान्तभित्र जिल्लाका एक सय चार वटै वटा र टोल कमिटिहरुको अधिवेशन गरिसक्ने एमाले धादिङको बैठकले निर्णय गरेको छ ।
२०८१ बैशाख १५ गतेभित्र सबै पालिका कमिटीको अधिवेशन सम्पन्न गरिसक्नेछ । वडा र पालिकाहरुको इन्चार्ज समेत तोकेर पठाइसकेकोले तोकिएकै समयभित्र विवादरहित ढंगबाट अधिवेशन सम्पन्न गराइने नेकपा एमाले धादिङका अध्यक्ष भुमि त्रिपाठीले बताए ।

उनले भने– ‘नेकपा एमाले धादिङले अधिवेशनको बेला भएका त्रुटिहरुलाई पनि आत्मसाथ गर्दै सिंगो एमाले पार्टीलाई आम जनताको साझा पार्टी बनाउदै सबैलाई समेटेर अगाडि बढ्नेछ ।’
वडा र पालिकाहरुको अधिवेशन सकिएलगत्तै पालिकाहरुले जनसरोकारका सवालहरुको पहिचान गरी त्यसको जनदबाबको योजना बनाई कार्यान्वयन गर्नेछ । जिल्लामा समेत जनसरोकारका सवालहरुको पहिचान गरी दबाबका कार्यक्रमहरु गर्ने एमाले धादिङका उपाध्यक्ष अर्जुन कुमार श्रेष्ठ (गोर्खाली)ले जानकारी दिए ।

नेकपा एमालेले पार्टीको विधान बमोजिम हरेक वर्षको फागुन र चैत्र महिना पार्टी सदस्यता नविकरण र नयाँ सदस्यता प्रदान गर्ने महिनाको रुपमा रहेकोले २०८१ सालको सदस्यता नविकरणका लागि सम्पूर्ण पालिका कमिटीले योजना बनाएर अभियान संचालन गर्ने भएको छ । नवौं जिल्ला अधिवेशनबाट नवनिर्वाचित नेताहरुलाई विशेष प्रशिक्षण दिएर नयाँ सदस्यता प्रदान अभियान थाल्न लागेको हो । सम्पूर्ण पार्टी सदस्य तथा नेताहरुलाई प्रशिक्षण दिएर सदस्यता नविकरण र नयाँ सदस्य बनाउने अभियान संचालन गर्ने योजना बनाएको नेकपा एमाले धादिङका प्रचार विभाग प्रमुख शंकर श्रेष्ठले जानकारी दिए ।