धादिङका बालबालिकालाई दादुरा–रुबेलाविरुद्ध खोप लगाइँदै

धादिङमा आगामी फागुन दोस्रो साताबाट दादुरा–रुबेला खोप अभियान सुरु हुने भएको छ । दादुरा–रूबेला सङ्क्रमणको जोखिमलाई मध्यनजर गर्दै फागुन १३ देखि चैत ७ गतेसम्म २२ हजार २ सय ३७ बालबालिकालाई खोप लगाईने लक्ष्य रहेको नीलकण्ठ नगरपालिकाका स्वास्थ्य संयोजक विष्णु रिजालले जानकारी दिनुभएको छ ।जिल्लामा नौ महिना पुगेर पाँच वर्षमुनिका बालबालिकालाई दादुरा–रूबेला विरुद्धको खोप दिन लागेको हो।

त्यस्तै नीलकण्ठ नगरपालिका, ज्वालामुखी गाउँपालिका, सिद्धलेक गाउँपालिका र नेत्रावति डबजोङ गाउँपालिकामा भने फागुनको २२ गतेदेखि २८ गतेसम्म खोप अभियान संचालन हुनेछ । आज धादिङबेसीमा पालिका खोप समन्वय समिति, संचारकर्मी र सरोकारवालाहरु सँग छलफल तथा अन्तरक्रिया गरि जानकारी गराएको हो । जिल्लाका २ सय २ वटा नियमित खोप केन्द्रबाट खोप अभियान सञ्चालन हुने स्वास्थ्य संयोजक रिजालले बताउनुभयो ।

खोप अभियानका लागि जिल्लाभर २१ जना स्वास्थ्यकर्मी, ४२ जना स्वयंसेवक र १५ जनाले एइएफआईको अनुगमन गर्ने चिकित्सकको टोली रहने उहाँले बताउनुभयो । गत वर्ष पनि नेपालमा दादुराको प्रकोप भएको थियो। लुम्बिनी प्रदेशका अर्घाखाँची, दाङ, बाँके, बर्दिया र कपिलवस्तुसहित १९ जिल्लामा दादुराको प्रकोप देखिएको थियो। अर्घाखाँचीमा ११, दाङमा ३९, बर्दिया ७२, बाँकेमा तीन सय २९ र कपिलवस्तुमा २३ जना दादुराका बिरामी फेला परेका थिए। गत वर्ष नेपालमा एक हजार तीन सय ४९ जनामा दादुरा संक्रमण पुष्टि भएपछि खोप अभियानको सुरुवात गरिएको हो।