Pabil News
Colored smoke on a dark background. Blue and red light with smoke.
न बत्ति बलेकाे छ न चुलाे जलेकाे छ
चकमन्न त्याे गाउँमा खुशी ढलेकाे छ
रमाइला चाडवाड के हुन् थाहै पाएन
त्याे पल्लाे गाउँमा कहिल्यै दशैं आएन ।
बर्षाैं कट्छ एकथान टालेका फरियाले
दु:ख बिसाउने ठाउँ भेटेनन् ति भरियाले
मिठाे मसिनाे त परै पेटभर खानै खाएन
त्याे पल्लाे गाउँमा कहिल्यै दशैं आएन ।।
न काटिन्छ खसी न आउँछन् काेही पाहुना
साहुकाे ऋण हरेक साल बढ्छ दुई गुना
कति बर्षात रूझेरै गए चुहिने छाना छाएन
त्याे पल्लाे गाउँमा कहिल्यै दशैं आएन ।।।
न स्कुल देखेका छन् न सीप सिकेका छन्
छाक टार्न एकमाना दानामा बिकेका छन्
विभेदकाे त्याे घाउमा कसैले मलम लाएन
त्याे पल्लाे गाउँमा कहिल्यै दशैं आएन ।।।।
छेउकै अर्काे गाउँमा तिमी नाच्छाै खुशीले
हावामा सम्पत्ति उडाएर बाँच्छाै बेहाेसीले
आफ्नो स्वार्थ बाहेक कसैले केही चाहेन
त्याे पल्लो गाउँमा कहिल्यै दशैं आएन ।।।।।
(गैह्रे हाल धादिङका प्रमुख जिल्ला अधिकारी हुन् ।)
About The Author
