
भारत र पाकिस्तानसँगको खेलमा प्रदर्शित आत्मविश्वास र कौशलले नेपाली क्रिकेटरहरूको क्षमता र सम्भावना प्रमाणित भएको छ
भारत र पाकिस्तानजस्ता विश्वविख्यात टिमका सामु ‘सिकारु’ लाग्ने नेपाली क्रिकेटर टिक्नै नसक्ने डर कताकता समर्थकहरूमा थियो । तर, नेपाली खेलाडीले समर्थकलाई निराश होइन उत्साहितै बनाए ।
नेपाली क्रिकेटरहरूले सोमवार श्रीलङ्कामा भारतसँग भएको खेल नजिते पनि उत्कृष्ट खेल प्रदर्शन गरे । यसले फेरि एकपटक नेपाली क्रिकेटको सम्भावना उजागर गरेको छ ।
खेल हारेको नेपाली क्रिकेट टिमको प्रशंसा भारतीय दर्शक र समीक्षकले समेत गरे । नेपाली खेलाडीको प्रदर्शनको उत्कृष्ट रहेको पुष्टिका लागि यत्ति नै काफी छ ।
भारत र पाकिस्तानसँगको खेलमा प्रदर्शित आत्मविश्वास र कौशलले नेपाली क्रिकेटरहरूको क्षमता र सम्भावना प्रमाणित भएको छ ।
नेपालभित्र भने खेल र खेलाडीलाई प्रोत्साहित गर्ने वातावरण देखिँदैन । सरकारी वा निजी क्षेत्रले प्रतियोगिताका समयमा विभिन्न वाचा त गर्छन् तर प्रायः खेल सकिएपछि बिर्सन्छन् ।
सबै क्षेत्रमा निराशा व्याप्त भएका बेला बेलाबखत खेलकुदमा प्राप्त सफलताबाट नेपालीको अनुहारमा हाँसो देखिने गर्छ । यसलाई ‘अनुत्पादक क्षेत्र’ नठानीकन सरकार र उद्यमी व्यवसायीले पनि मन फुकाएर भरथेग गरून् ।
हारेर पनि शिर ठाडो भएको यस अवसरलाई खेल क्षेत्रको समग्र समीक्षा गर्न र योजनाबद्ध विकासको खाका बनाउन प्रयोग गर्नु उचित हुनेछ । नेपाल क्रिकेट संघका पदाधिकारीले आपसी दन्तबझान छाडी क्रेिकेट र क्रिकेटरको हितमा सबै क्षेत्रलाई एकजुट बनाउन ध्यान दिऊन् ।