एसइईमा धादिङबाट नियमित तर्फका एक जनाले मात्रै ल्याए जिपिए चार

धादिङ– यस वर्षको एसइईमा नियमित तर्फबाट धादिङका एक जनाले मात्र ४ जिपिए ल्याएका छन् ।

विहिबार सार्वजनिक नतिजा अनुसार सिम्बोल नम्बर ०२६०२०९३ का भएका धादिङ बोर्डिङ स्कुलका आदर्श सुवेदीले जिपिए ४ ल्याएका हुन् । कास्की जिल्ला घर भई हाल नीलकण्ठ नगरपालिका–३ धादिङबेसीमा परिवारसहित बस्दै आएका सुवेदीका बुवा आमा नै शिक्षक हुन् ।

त्यस्तै नियमित तर्फबाट सिम्बोल नम्बर ०२६००१९५ र ०२६०२१२१ भएका दुई जनाले ३ दशमलव ९५ जिपिए ल्याएका छन् । ३ दशमलव ९५ जिपीए ल्याउने दुईजना मध्य सृजना लगुन पनि धादिङ बोर्डिङकै विद्यार्थी हुन् । जिल्लाभरबाट नियमित तर्फबाट ११ जनाले ३ दशमलव ९० जिपिए ल्याएका छन् ।

नियमित तर्फबाट एसइई दिएका ५ हजार ८७ जना मध्ये ३३ जना परीक्षामा अनुपस्थित देखिएका छन् । एसइई २०७९ को परिक्षामा धादिङबाट कुल ५ हजार ३ सय ८९ जना विद्यार्थीहरु सहभागी भएका थिए । प्राविधिक तर्फ २ सय ४७ जना र ग्रेड वृद्धि तर्फ ५५ जनाले परिक्षा दिएका थिए ।