धादिङमा २० वर्ष मुनीका आमाको संख्या अझै डरलाग्दो

धादिङ– ‘विवाहवारी २० वर्ष पारी’ भन्ने नारा घन्किरहँदा यो वर्षमात्रै धादिङमा चार सय ५६ जनाले २० वर्ष उमेर नपुग्दै बच्चा जन्माएका छन् । स्वास्थ्य कार्यालय धादिङको तथ्यांक अनुसार १४ वर्षकी किशोरीले पनि बच्चा जन्माएकी छन् ।

सूचना तथा सञ्चार केन्द्र र बुद्ध हेल्थ प्रोमोशन एजुकेसन सेन्टरले आयोजना गरेको परिवार नियोजन तथा सुरक्षित मातृत्वसम्बन्धी अन्तरक्रियामा स्वास्थ्य कार्यालय धादिङले यो तथ्यांक सार्वजनिक गरेको हो । २० वर्ष भन्दा कम उमेरका ४४ जनाले अस्पतालमा पुगेर आधिकारिक रुपमा गर्भपतन गराएको तथ्यांक स्वास्थ्य कार्यालयसँग छ ।

धादिङ जिल्लामै बसोबास गरेर अन्यत्रको स्वास्थ्य संस्थामा सुत्केरी गराएका र अनाधिकृत ढंगबाट गर्भपतन गराएकाहरुको संख्या खोजी गर्ने हो भने २० वर्ष भन्दा कम उमेरमा बच्चा जन्माउने र गर्भपतन गराउनेको संख्या अझ बढ्न सक्ने स्वास्थ्य कार्यालय धादिङका प्रमुख डा.नरेन्द्र कुमार झाले बताए । ‘यो तथ्यांक आर्थिक वर्ष २०७९/०८० को बैशाख महिनासम्मको हो’, उनले भने–‘अनाधिकृत रुपमा गर्भपतन गराउने र जिल्ला बाहिरका स्वाथ्य संस्थामा बच्चा जन्माउनेको संख्या खोजी ग¥यो भने दुबैको संख्या बढ्ने देखिन्छ ।’

मातृमृत्युदरको संख्या भने यो वर्ष शुन्य छ । तर, जन्मेको २८ दिनभित्रका ३ जना शिशुले ज्यान गुमाउनु परेको छ । तथ्यांक अनुसार गर्भ चेकजाँच गराउन आउने र आइरन चक्की प्रयोग गर्नेहरुको संख्या भने घटेको छ ।

जिल्लाको स्वास्थ्य अवस्था सुधार्न आगामी दिनमा पनि सचेतनामूलक सन्देशहरु प्रचारप्रसार गर्नुपर्ने बताउनले बताए । सरकारले नीति तथा कार्यक्रममा नै सुरक्षित मातृत्व र प्रजनन स्वास्थ्यलाई उच्च प्राथमिकतामा राखेको छ भने सन् २०३० सम्मको दिगो विकास लक्ष्यमा पुग्नका लागि नवजात शिशु तथा मातृ मृत्युदर घटाउने उद्देश्य राखेको छ ।