धादिङ–२ मा २५८७ मत गन्दा गठबन्धन २४१ मतले अगाडि

धादिङ– धादिङ क्षेत्र नम्बर २ मा अहिले २५ सय ८७ मत गणना भएको छ । अहिलेसम्मको प्रारम्भीक मत परिणाम अनुसार गठबन्धनका उम्मेदवार २ सय ४१ मतले अगाडि देखिएको छ ।

प्रतिनिधिसभा सदस्यमा सत्ता गठबन्धनको तर्फबाट नेपाली कांग्रेसका जिल्ला सभापति रामनाथ अधिकारीले १२ सय ५७ मत पाएका छन् । एमाले नेता एवं पूर्व सांसद खेम प्रसाद लोहनीले १ हजार १६ मत पाएका छन् ।

ज्वालामुखी-७, गंगाजमुना-७, त्रिपुरासुन्दरी-४ र नीलकण्ठ-१३ को मतपेटिका मिसाएर गणना भैरहेको छ ।

धादिङ क्षेत्र नं. २ को प्रदेशसभा १ सत्ता गठबन्धनको तर्फबाट नेपाली कांग्रेसका गोविन्द लम्साल र नेकपा एमालेबाट डा.रामकुमार अधिकारीबीच प्रतिष्पर्धा छ । त्यस्तै प्रदेशसभा २ मा सत्ता गठबन्धनको तर्फबाट नेकपा माओवादी केन्द्रका नेता एवं पूर्व सांसद जगत बहादुर सिंखडा र राप्रपाका डम्बर तामाङबीच प्रतिष्पर्धा छ ।

धादिङ २ मा एमाले र राप्रपाबीच तालमेल छ । तालमेलपछि प्रतिनिधिसभा र प्रदेशसभा १ मा राप्रपाले एमालेलाई सघाएको छ भने प्रदेश २ मा एमालेले राप्रपालाई सहयोग गरेको छ ।