खनियाबास गाउँपालिकाको अध्यक्षमा रणबहादुर तामाङ र उपाध्यक्षमा सेकेमान तामाङ विजयी

धादिङ: धादिङको खनियाबास गाउँपालिका अध्यक्षमा नेपाली काँग्रेसका उम्मेदवार रणबहादुर तामाङ विजयी भएका छन् भने उपाध्यक्षमा नेकपा माओवादी केन्द्रका उम्मेदवार सेकेमान तामाङ विजयी भएका छन् ।

गाउँपालिका अध्यक्ष विजयी भएका रणबहादुरले एक हजार ६ सय ९ मत ल्याएका छन् । उनका निकटतम प्रतिद्धन्द्धि स्वतन्त्र उठेका फुलबहादुर तामाङले एक हजार तीन सय ९६ मत ल्याएका छन् । उनी २०७४ सालको स्थानीय तह निर्वाचनमा पनि विजयी भएका थिए ।

त्यस्तै गाउँपालिका उपाध्यक्षमा विजयी सेकेमानले एक हजार आठ सय ३७ मत ल्याएका छन् । उनका निकटतम प्रतिद्धन्द्धि राष्ट्रिय प्रजातन्त्र पार्टीका मरियम तामाङले एक हजार दुई सय ३७ मत ल्याइन् । अध्यक्ष र उपाध्यक्षमा विजयी भएकाहरु गठबन्धनबाट उम्मेदवार बनेका थिए ।

खनियाबास गाउँपालिका वडा नं १, २ र ३ मा राप्रपाका उम्मेदवारहरु क्रमश सोनाम बहादुर तामाङ, अरुण कुमार पाख्रिन, कमान सिंह तामाङ, वडा नं ४ मा नेपाली काँग्रेसका उम्मेदवार लिलामान तामाङ र वडा नं ५ मा नेकपा एमालेका उम्मेदवार रविन कुमार तामाङ विजयी भएका छन् ।