रात्रिकालीन व्यवसाय अब २४ सै घण्टा खोल्न पाइने

काठमाडौ– गृह मन्त्रालयले होटल तथा मनोरञ्जनात्मक व्यवसाय सञ्चालनका लागि नयाँ मापदण्ड बनाएको छ ।

मापदण्ड अनुसार रात्रिकालीन व्यवसायमा लगाइँदै आएको समय सीमा हटाएर २४ सै घण्टा चल्न दिने निर्णय भएको छ । गृहको निर्णयसँगै अब होटल, रेष्टुरेन्ट, डान्स, दोहोरी क्लब, लाउन्ज बारलगायतका सबै रात्रिकालीन व्यवसाय २४ सै घण्टा सञ्चालन हुन पाउने भएका छन् । यसअघि प्रहरी प्रशासनले राति १० बजेपछि कुनै पनि रात्रिकालीन व्यवसाय सञ्चालनमा रोक लगाएको थियो ।

जसअनुसार अब रात्रिकालिन व्यवसाय सञ्चालन गर्न छुट्टै इजाजत प्राप्त गर्नुपर्ने छ । प्रत्येक व्यवसायीले आफ्नो कारोवार सञ्चालन गर्दा सार्वजनिक सदाचार र नैतिकताको अनिवार्य पालना गर्नुपर्नेछ । ‘सेवा लिइसकेपछि व्यवसायस्थलबाट आफ्नो घरसम्म पुर्याइदिन ग्राहकले अनुरोध गरे सम्बन्धित व्यवसायीले स–शुल्क सवारीसाधनको व्यवस्था गर्नुपर्नेछ,’ मापदण्डमा भनिएको छ ।

डान्सबार तथा नृत्य प्रस्तुत हुने स्थानमा अश्लिलता प्रदर्शन हुने गरी नाच्न नपाइने मापदण्डमा उल्लेख छ ।आन्तरिक तथा वाह्य पर्यटनलाई टेवा पुग्ने सेवाग्राहीको रुपमा सेवा लिन आउने सबै पाहुनालाई स्वस्थ मनोरञ्जन प्रदान गर्न निर्देशनसमेत दिइएको छ ।

१८ वर्ष मुनिकालाई मादक पदार्थ तथा सुर्तीजन्य पदार्थ प्रयोगमा रोक लगाइएको छ । साथै,डान्सबार, रेस्टुरेण्ट एण्ड बार,लाइभ ब्याण्ड, लाउन्ज बारमा उनीहरुलाई प्रवेश निषेध गरिएको छ । प्रचलित ऐन कानुनको पूर्ण रुपमा परिपालना गरेर मात्र व्यवसाय सञ्चालन गर्न पाइने छ ।