एसएलसीमा धादिङ जिल्लाबाट सन्देश र जुनु प्रथम

धादिङ – एसएलसी परीक्षामा धादिङ जिल्लाबाट सन्देश भट्ट र जुनु श्रेष्ठ बराबरी अंक ल्याएर जिल्ला प्रथम हुनु भएको छ ।

सदरमुकाम धादिङबेसीमा रहेको धादिङ आवसीय उच्च माध्यमिक विद्यालयबाट परीक्षा दिएका उनीहरुले ७ सय ३९ (९२.३८ प्रतिशत ) अंक ल्याएका छन् । जिल्ला प्रथम हुन सफल भएको भन्दै शनिबार पञ्चेबाजाका साथमा धादिङबेसीमा अबिर यात्रा गरिएको छ । निरन्तर एसएलसी परीक्षामा जिल्लाकै सवोत्कृष्ट अंकका साथमा जिल्ला प्रथम हुन सफल भएको भन्दै विद्यालयले खुसी मनाएको विद्यालयका प्रधानाध्यपक हरि लंम्सालले जानकारी दिनुभयो ।

धादिङ आवसीय उच्च माध्यमिक विद्यालयबाट २०७१ सालमा ५५ जनाले एसएलसी परीक्षा दिएका थिए । जस मध्ये ४६ जना विशिष्ट श्रेणी र बाँकी ९ जना प्रथम श्रेणीमा पास भएका छन् ।

यस वर्ष धादिङ जिल्लामा नियमित तर्फ ३ हजार ६ सय ५४ विद्यार्थीहरु उतीर्ण भएका छन् भने एक्जामटेड तर्फ ३ सय ३४ जना विद्यार्थीहरु उतीर्ण भएका छन् । परीक्षा नियन्त्रण कार्यलय सानो ठिमि भक्तपुरले शुक्रबार प्रकाशित गरेको नतिजा अनुसार धादिङ जिल्लाबाट नियमित तर्फका विद्यार्थीहरु मध्ये २ सय ४० जना विशिष्ट श्रेणीमा, १ हजार ३ सय २० जना प्रथम श्रेणीमा, २ हजार ४ जना द्धितीय श्रेणीमा र १ सय २३ जना तृतीय श्रेणीमा पास भएका छन् । त्यस्तै एक्जामटेड तर्फ २ जना प्रथम श्रेणीमा, २ सय ४६ जना द्धितीय श्रेणीमा र ९० जना तृतीय श्रेणीमा पास भएको जिल्ला शिक्षा कार्यलय धादिङका विद्यालय निरीक्षक कृष्ण अधिकारीले जानकारी दिनुभयो ।