खाद्य प्रविधि विभागबाटै तरकारी जाँच गरिने

१९ भदौ , विराटनगर —

संघीय सरकारकमातहतको खाद्य प्रविधि तथा गुण नियन्त्रण विभाग, यसका शाखा र कार्यालयहरूले तरकारीमा विषादीको मात्रा परीक्षण गर्ने भएका छन् । संघीय सरकारले खाद्य प्रविधि तथा गुण नियन्त्रण विभागलाई विषादी परीक्षणका लागि सशक्त रूपले तयार पार्न लागेको केन्द्रीय कृषि प्रयोगशालाका प्रमुख सहसचिव कञ्चनराज पाण्डेले बताए ।

‘चाँडै विभागले सातै प्रदेशका कार्यालयहरूमा विषादी परीक्षण सुरु गर्छ,’ पाण्डेले भने, ‘तर, प्रदेश १ सरकारको प्रयोगशालाले निर्वाध स्थानीय उत्पादनको परीक्षण गर्न पाउँछ ।’

विराटनगरस्थित खाद्य प्रविधि तथा गुण नियन्त्रण कार्यालयले सरोकारवाला उद्योग, वाणिज्य तथा आपूर्ति मन्त्रालयसँगको समन्वयमा गृहकार्य भइरहेको जनाएको छ । ‘तरकारीमा विषादी परीक्षणको मात्रा मानव स्वास्थ्यसँग जोडिएको हुनाले निःसन्देह हाम्रो कार्याधिकारमा पर्छ,’ उक्त कार्यालयका प्रमुख प्रमोद कोइरालाले भने, ‘विज्ञता, दक्षता र प्रविधि प्रयोगको हिसाबले पनि जनशक्ति पनि खाद्य प्रविधि कार्यालयसँगै छ ।’

यता सञ्चालनमा आएको डेढ महिनाभन्दा बढी भइसक्दा पनि प्रदेश १ को राजधानी विराटनगरस्थित ‘विषादी अवशेष द्रुत विश्लेषण प्रयोगशाला’ निष्प्रभावी देखिएको छ । २५ असारदेखि सञ्चालनमा आएको उक्त प्रयोगशालामा ११ भदौसम्म भारतबाट आयातित तरकारीको केवल ४९ वटा नमुनाको परीक्षण भएको छ ।

२०७६ भदौ १९ गते प्रकाशित