कहाँ कहाँबाट पाइन्छ दशैंका लागि नयाँ नोट ?

८ असोज, काठमाडौँ –

दशैँका लागि लक्षित गर्दै नेपाल राष्ट्र बैंकले करिब डेढ अर्ब रुपैयाँ बराबरको नयाँ नोट निष्कासन गर्ने भएको छ । असोज २१ गतेदेखि सर्वसाधारणलाई नोट साट्न खुला गरिने व्यवस्थामा एक व्यक्तिले अधिकतम २७ हजार रुपैयाँसम्म साट्न पाउने राष्ट्र बैंकले जनाएको छ ।

केन्द्रीय बैंकले बजारमा ५, १०, २०, ५० र १०० दरका नयाँ नोट ल्याउने भएको हो । नेपाल राष्ट्र बैंक मुद्रा व्यवस्थापन विभाग थापाथलीबाट प्रतिव्यक्ति २७ हजार रुपैयाँ बराबरको नोट साट्न पाइने व्यवस्था मिलाइएको मुद्रा व्यवस्थापन विभाग प्रमुख एवम् कार्यकारी निर्देशक लक्ष्मीप्रपन्न निरौलाले जानकारी दिए ।

यसका साथै सर्वसाधारण नागरिकले सहज रुपमा नयाँ नोट सटही गर्न सकून् भन्ने उद्देश्यले राष्ट्र बैंकको अलावा अन्य तीन बैंकका शाखाबाट पनि नोट साट्ने व्यवस्था मिलाइएको छ । यसले विगतमा जस्तो भिडभाड र सकस नहुने राष्ट्र बैंकको बताएको छ ।

नेपाल बैंकका न्युरोड, बालाजु, पाटन औद्योगिक क्षेत्र, कीर्तिपुर र भक्तपुर कार्यालय, राष्ट्रिय वाणिज्य बैंकका सिंहदरबार प्लाजा भवन, टेकु, नयाँ बानेश्वर, सानोठिमी, विशाल बजार र नक्साल शाखाबाट नयाँ नोट साट्न सकिने छ भने, कृषि विकास बैंकका गौशाला, कोटेश्वर, रामशाहपथ, रत्नपार्क र मंगल बजार शाखाबाट नयाँ नोट साट्न सकिनेछ । यसवर्ष उपत्यका बाहिरका क्षेत्रमा पनि नयाँ नोट साट्न सकिने व्यवस्था मिलाइएको राष्ट्र बैंकले जनाएको छ ।

२०७५ असोज ८ गते प्रकाशित