धादिङमा ब्रासलेट लगाएको निहुँमा शिक्षकद्धारा विद्यार्थीमाथि कुटपिट

२ चैत, धादिङ –

ब्रासलेट लगाएर विद्यालयमा आएको निहुँमा धादिङको एक विद्यालयमा अध्ययनरत विद्यार्थीलाई शिक्षकले कुटपिट गरेको छ ।

धादिङको त्रिपुरासुन्दरी गाउँपालिका ७, खहरेमा रहेको अर्चने उच्च माध्यमिक विद्यालयको कक्षा ११ मा अध्ययनरत सीजन अधिकारीलाई बुधबार सोही विद्यालयका प्रधानाध्यपक तथा अन्य शिक्षकहरुले कुटपिट गरेको हो ।

शिक्षकको कुटपिटबाट सीजनको ढाडमा र अनुहारमा कोतारिएको छ । विद्यालयमा चाँदीको ब्रासलेट लगाएर आउँदा सोही विद्यालयका सहायक प्रधानाध्यपक भीमबहादुर थापाले सुरुमा तीन थप्पड हानेको सीजनले बताए । त्यसपछि अन्य सरहरुले कुटेको सीजनको भनाई छ । ‘भोलिदेखि नलगाई आउँछु भन्दा अरु सरहरु पनि आएर पाइपै पाइपले कुटन थाल्यो’ सुजनले भने, ‘बालमैत्री विद्यालय भन्छन् तर गोरु चुटेको जसरी चुट्छन् ।’

विद्यालयका प्रधानाध्यपक झयराम सिटौलाले आवेगमा आएर घटना भएको बताएका छन् । ‘विद्यार्थीलाई अनुशासनमा रहन हामीले पटक पटक भनिरहेका छौँ’ प्रधानाध्यपक झयरामले भने, ‘विद्यालयको अनुशासन नमान्दा हामीले आबेगमा पिट्यौ ।’ उनले विद्यार्थीले पनि शिक्षकलाई अभद्र व्यवहार गरेको बताएका छन् । गल्ती दुवै पक्षको रहेको उनले बताए । सुजनको आमा बुबा सानैमा बितेकाले आफन्तको घरमा बस्दै आइरहेका छन् ।

२०७४ चैत २ गते प्रकाशित