Pabil News
३ फागुन, काठमाडौँ
नेकपा एमाले अध्यक्ष केपी शर्मा ओली प्रधानमन्त्री नियुक्त भएका छन् । राष्ट्रपति विद्यादेवी भण्डारीले संविधानको धारा ७६ को उपधारा २ बमोजिम ओलीलाई प्रधानमन्त्री नियुक्त गरेकी हुन्।
प्रधानमन्त्रीका रुपमा शेरबहादुर देउवाले देशवासीको नाममा सम्बोधन गर्दै राजीनामा दिएपछि राष्ट्रपति कार्यालयले संविधान अनुसार ओलीलाई प्रधानमन्त्री नियुक्त गरेको हो। ओलीलाई प्रधानमन्त्री नियुक्त गर्न एमाले र माओवादीले बिहीबार नै राष्ट्रपति समक्ष समर्थनको पत्र बुझाएका थिए । देउवाले सम्बोधनलगतै राजीनामा पत्र बोकेर शितलनिवास पुगेका थिए।
ओलीसहित नेकपा माओवादी केन्द्रका अध्यक्ष पुष्पकमल दाहाल, नारायणकाजी श्रेष्ठ, माधव नेपाल, ईश्वर पोखरेल, सुवास नेम्बाङ, अग्नी खरेल पत्रसहित शितलनिवास पुगेका थिए।
नयाँ प्रधानमन्त्री नियुक्तीसँगै ओली दोस्रो कार्यालयका लागि प्रधानमन्त्री बनेका छन्। नवनियुक्त प्रधानमन्त्री ओलीले दिउँसो ४ बजे शीतल निवासमा सपथ लिने छन्। २७५ सदस्यीय प्रतिनिधिसभामा एमालेका १२१ र माओवादीका ५३ गरी १६४ सासद छन्। प्रतिनिधिसभाबाट ओलीले एक महिनाभित्र बहुमत प्राप्त गर्नुपर्ने हुन्छ।
२०७४ फागुन ३ गते प्रकाशित
About The Author
