देउसीभैलोबाट १ लाख भन्दा बढि रकम संकलन, समाजसेवामा खर्चने

रेखबहादुर गुरुङ / २५ कात्तिक, धादिङ –
धादिङ नाट्य समाजले देउसी भैलोबाट १ लाख ५ हजार ५ सय ८६ रुपैयाँ रकम संकलन गरेको छ ।

शुभदिपावलीको पावन अवसरमा विभिन्न ठाउँमा देउसीभैलो खेलेर उक्त रकम संकलन गरेका हुन् । “प्रतिभाको खोजी कलाको सम्मान, समाज रुपान्तरण हाम्रो अभियान” भन्ने मुख्य नाराका साथ स्थापना भएको धादिङ नाट्य समाजले जिल्लामा विभिन्न जनचेतनामुलक नाटक तथा विभिन्न कार्यक्रमहरु गर्दै आईरहेको छ ।

देउसीभैलोबाट संकलित रकम समाजसेवामै खर्च गरिने धादिङ नाट्य समाजका अध्यक्ष शालिग्राम अधिकारीले जानकारी दिनुभयो । समन्वय गर्दै रक्तदान, लक्षित वृद्धवृद्धा र वालवालिकाहरु लागि न्यान्यो कपडा वितरण गर्ने आफुहरुले सोच बनाएको अध्यक्ष अधिकारीले बताए ।

पछिल्लो समय विभिन्न समुहमा आवद्ध भएर देउसी खेल्ने अनि वनभोज र घुमघामै खर्च गरिरहेको चलनचल्तीलाई चिर्दै समाजबाट उठेको रकमलाई समाजसेवामै खर्चिन लागेको धादिङ नाट्य समाजका सचिव सुदिप अर्यालले बताए ।