चितवनमा प्रशासनको निगरानीपछि प्राध्यापकद्वारा धमाधम राजीनामा

६ भदौ, चितवन – स्थानीय प्रशासनले एउटै सिफ्टमा दुई वा सोभन्दा बढी क्याम्पसमा पढाउने प्राध्यापकमाथि निगरानी थालेसँगै यहाँका सामुदायिक र निजी क्याम्पसका प्राध्यापकहरुले राजीनामा दिन थालेका छन्।

सरकारी र सामुदायिक क्याम्पसमा हाजिर गर्ने र निजी एवम् अर्को सामुदायिक क्याम्पसमा पढाउन जाने प्रचलन बढेपछि स्थानीय प्रशासनले त्यस्ता प्राध्यापकमाथि कारबाही प्रक्रिया अगाडि बढाएको छ।

निगरानी बढाएसँगै भरतपुरको सप्तगण्डकी बहुमुखी क्याम्पसबाट पुराना सातजना प्राध्यापकले राजीनामा दिएका छन्। सहायक क्याम्पस प्रमुख धर्मराज घिमिरेका अनुसार क्याम्पसको स्थापनादेखि नै कार्यरत प्राध्यापकले समेत राजीनामा दिएका छन्। सोही सिफ्टमा सरकारी क्याम्पस वीरेन्द्र बहुमुखी क्याम्पसमा समेत पढाउँदै आएका उनीहरुले प्रशासनको निगरानीपछि राजीनामा दिएका हुन्।

त्यसैगरी भरतपुरकै मैयादेवी कन्या क्याम्पसका दुई पूर्व क्याम्पस प्रमुखसहित पाँच जनाले राजीनामा दिएका छन्। क्याम्पस प्रमुख कृष्ण न्यौपानेका अनुसार वीरेन्द्र क्याम्पसमा एउटै सिफ्ट परेपछि उनीहरुले राजीनामा दिएका हुन्। राजीनामा दिएलगत्तै राजीनामा स्वीकृत गरिएको क्याम्पस सञ्चालक समितिका अध्यक्ष टङ्कनाथ पौडेलले बताए। स्थापनाकालदेखिका प्राध्यापक भएकाले धेरै सुविधा खाने प्राध्यापकले छाडेसँगै क्याम्पसको व्ययभारमा समेत कटौती भएको छ।

अर्को बालकुमारी क्याम्पस नारायणगढमा कार्यरत दुईजना प्राध्यापकले पनि राजीनामा दिएको क्याम्पस प्रमुख शिव पौडेलले बताए। ‘दुईजनाले यहाँ छोडेर वीरेन्द्र क्याम्पसमा पढाउन थाल्नुभयो, एकजनाले वीरेन्द्र क्याम्पस छोडेर यहाँ मात्रै पढाउन थाल्नुभएको छ,’ उनले भने।

त्यस्तै सरकारी स्वामित्वको स्कुल अफ हेल्थ साइन्स भरतपुरमा पढाउँदै आएका केही प्राध्यापक हाजिर गर्न जान छाडेको प्रिन्सिपल अच्युत दाहालले बताए। अहिले कक्षा सञ्चालन नभएकाले हाजिरमात्रै गर्नुपर्नेमा अन्य क्याम्पसमा पूर्णकालीन भएकाले हाजिर गर्न नमिल्ने भन्दै केही प्राध्यापक हाजिर गर्न आउन छाडेको उनले बताए। उनीहरुको तलब रोक्का गरिएको छ ।

नेपाल पब्लिक क्याम्पस सङ्घ चितवनका अध्यक्ष कृष्ण सुवेदीले क्याम्पसहरु स्वयम्ले गर्नुपर्ने निगरानी प्रशासनले गर्नु सकारात्मक रहेको बताए। आफू क्याम्पस प्रमुख रहेको सहिद स्मृति कलेजमा भने गतवर्षदेखि नै यसमा कडाइ गरिएकाले अहिले कसैले राजीनामा दिनु नपरेको बताए।

यसको प्रत्यक्ष प्रभाव जिल्लाका निजी उच्च माविहरुमा पनि परेको छ। अधिकांश वीरेन्द्र बहुमुखी क्याम्पस पढाउने प्राध्यापकले यहाँका निजी उच्च मावि सञ्चालन गरेका छन्। सिफ्ट मिलाउन सक्नेबाहेक अधिकांशले निजी पढाउन नपाउने भएपछि उच्च माविहरुले प्राध्यापकको रुटिङ मिलाउन कठिन भएको जनाएका छन्।

निजी उच्च माविहरुको संस्था ९हिसान० चितवनका अध्यक्ष भूपेन्द्र धितालले कतिपय निजी उच्च माविको जिम्मेवारीसमेत सरकारी एवम् सामुदायिक क्याम्पसका प्राध्यापकले सम्हालेको भन्दै यसले प्रत्यक्ष प्रभाव पार्ने बताए। यद्यपि विधि सिकाउने प्राध्यापक एकै समयमा दुई ठाउँमा पढाउन जानु आफैँमा लाजमर्दो भएकाले प्रशासनले गरेको निगरानी स्वागतयोग्य रहेको बताए। विज्ञान विषयका केही प्राध्यापकहरु भने पाउन कठिन हुने हुँदा समस्या पर्ने उनले बताए।

स्थानीय प्रशासनले एकै सिफ्टमा दुई वा सोभन्दा बढी ठाउँमा पढाउने प्राध्यापकमाथि कारबाही गर्ने जनाउँदै सबै क्याम्पसबाट रुटिङ मागेपछि प्राध्यापकहरुले राजीनामा दिन थालेका हुन्। रासस