रियल मड्रिड च्याम्पियन्स लिगको फाइनलमा

२३ बैशाख, धादिङ – स्पेनिस क्लब रियल मड्रिड च्याम्पियन्स लिग फुटबलको फाइनलमा प्रवेश गरेको छ ।

बुधबार राति घरेलु मैदानमा भएको सेमिफाइनलको दोस्रो लेगमा इंग्लिस क्लब म्यानचेस्टर सिटीलाई १–० ले हराउँदै समग्रमा १–० को जितसहित नै रियल मड्रिडले फाइनलमा स्थान बनाएको हो । सिटीको मैदानमा भएको पहिलो लेग गोलरहित बराबरीमा सकिएको थियो ।

रियलको जितमा २० औं मिनेटमा म्यानचेस्टर सिटीका फर्नान्डोले गरेको आत्मघाती गोल नै निर्णायक बन्यो । रियल मड्रिडका ग्यारेथ बेलको क्रसको बललाई नियन्त्रण गर्ने क्रममा फर्नान्डोले आफ्नै पोस्टमा गोल हानेका हुन् ।

पहिलो पटक च्याम्पियन्स लिगको सेमिफाइनलमा पुगेको इंग्लिस क्लब सिटी १० पटकको उपाधि विजेता रियलसँग निराश बन्यो । रियल मड्रिडले अब उपाधिका लागि मे २८ मा छिमेकी क्लब एथ्लेटिको मड्रिडसँग खेल्नेछ ।

एथ्लेटिको मड्रिड सेमिफाइनलमा जर्मन क्लब बार्यन म्युनिखलाई हराएर फाइनलमा पुगिसकेको छ । यसअघि सन् २०१४ मा पनि रियल मड्रिड र एथ्लेटिको मड्रिड नै च्याम्पियन्स लिगको फाइनलमा पुगेका थिए ।