एथ्लेटिको मड्रिड च्याम्पियन्स लिगको फाइनलमा

२२ बैशाख, धादिङ – स्पेनिस क्लब एथ्लेटिको मड्रिड च्याम्पियन्स लिग फुटबलको फाइनलमा प्रवेश गरेको छ ।

मंगलबार राति भएको सेमिफाइनलको दोस्रो लेगमा जर्मन क्लब बार्यन म्युनिखसँग २–१ ले पराजित भएर समग्रमा २–२ को बराबरी भएपनि अवे गोलका आधारमा एथ्लेटिको मड्रिडले फाइनलमा स्थान बनाएको हो । घरेलु मैदानमा भएको पहिलो लेगमा एथ्लेटिको मड्रिड १–० ले विजयी भएको थियो । बार्यनको मैदानमा भएको दोस्रो लेगमा २–१ ले पराजित भएपनि बार्यनले पहिलो लेगमा गोल गर्न नसक्नु तथा एथ्लेटिकोले अवे गोल गर्नु फाइदाजनक बन्यो ।

एथ्लेटिको मड्रिड तीन वर्षमा दोस्रो पटक युरोपको प्रतिष्ठित प्रतियोगिता च्याम्पियन्स लिगको फाइनलमा पुगेको हो । ३१ औं मिनेटमा साबी एलोन्सोले फ्रि किकमा मार्फत गोल गर्दै दोस्रो लेगमा बार्यनलाई सुरुवाती अग्रता दिलाए । ५३ औं मिनेटमा एथ्लेटिकाका एन्टोनी ग्रिजम्यानले बराबरी गोल फर्काए । त्यसअघि थोमस मुलरको पेनाल्टी एथ्लेटिकोका गोल रक्षक ज्यान ओब्लाकले बचाएका थिए । एथ्लेटिकोका फर्नान्डो टोरेसले पनि पेनाल्टीमा गोल गर्न सकेनन् ।

थोमस मुलरले बार्यनलाई अघि लैजाने मौका पाएका थिए तर उनले पेनाल्टीको अवसरलाई सदुपयोग गर्न सकेनन् । एथ्लेटिको मड्रिड बार्यन म्युनिखसँग सन् १९७४ को युरोपियन कपको फाइनलमा पराजित भएको थियो भने दुई वर्ष अघि च्याम्पियन्स लिगको फाइनलमा रियल मड्रिडसँग हारेको थियो । तेस्रो पटक फाइनलमा पुगेको एथ्लेटिको यो पटक उपाधि जित्ने दाउमा छ । बार्यनले भने च्याम्पियन्स लिगमा लगातार पाँचौं पटक सेमिफाइनल खेलेको हो । एजेन्सी