हेटौँडामा आगलागी, एक करोडको क्षति

९ वैशाख, हेटौँडा -हेटौँडा उपमहानगरपालिका वडा नं १० मेन रोडस्थित धीरेन्द्र शाक्यको घरमा रहेको शाक्यको उत्तम ब्रदर्श नामको फर्मको प्लाइवुड, पेन्टस् र विद्युतीय सामग्री राखेको गोदाममा आज बिहान आगलागी भएको छ ।

उक्त आगलागी भएका घरधनी शाक्यले दिएको जानकारीअनुसार पानी तान्ने मोटर चलाइरहेको अवस्थामा आगलागी भएको हुँदा उक्त आगलागी विद्युत् सर्ट भएर हुन सक्ने बताइएको छ । गोदाममा रहेको प्लाइवुड, पेन्टहरु, विद्युतीय सामग्री र मोटरसाइकल एक वटा जलेर नष्ट भएको र करिब एक करोड बराबरको क्षति भएको जानकारी दिइएको छ ।

सो आगलागी नियन्त्रणका लागि हेटौँडा उपमहानगरपालिका र वीरगन्ज उपमहानगरपालिकाको दुईवटा दमकल प्रयोग गरिएको थियो । उक्त आगलागी नियन्त्रण गर्न सेना, प्रहरी, सशस्त्र प्रहरी र स्थानीयवासी परिचालित भएका थिए । उक्त आगलागी करिब २ः३० घन्टामा नियन्त्रणमा आएको थियो । रासस