झापा गोल्डकपको उपाधि आर्मीलाई

२८ चैत्र, झापा सर्वाधिक पुरस्कार राशिको प्रथम रमपम झापा गोल्डकपको उपाधि त्रिभुवन आर्मी क्लबले चुमेको छ ।

झापाको डोमामाल रङ्गशालामा भएको फाइनल खेलमा झापा ११ लाई १–० ले पछि पार्दै आर्मी क्लबले उपाधि चुमेको हो । उपाधिसँगै आर्मी क्लबले नगद छ लाखसहित शिल्ड मेडल र प्रमाणपत्र प्राप्त गरेको छ ।

खेल सुरु भएको १८औँ मिनेटमा स्ट्राइकर नवयुग श्रेष्ठले विभागीय टिमलाई अग्रता दिलाएका थिए । विमल रानामगरको पासलाई सदुपयोग गर्दै नवयुगले गोल गरेका हुन् ।

राष्ट्रिय प्रतियोगितामा उत्कृष्ट प्रदर्शन गर्ने आर्मीले झापा ११ लाई घरेलु मैदानमा पराजित गरेको छ । घरेलु मैदानमा उपविजेता बनेको झापा ११ ले नगद रु तीन लाख, मेडल र प्रमाणप्रत्र प्राप्त गरेको छ ।

यही चैत १८ गतेदेखि सुरु भएको प्रतियोगितामा १० वटा टिमले सहभागिता जनाएका थिए ।