बेल्जियमको राजधानी ब्रसेल्समा रहेको विमानस्थलमा दुई वटा बम विस्फोट

९ चैत, बेल्जियम – बेल्जियमको राजधानी ब्रसेल्समा रहेको विमानस्थलमा दुई वटा बम विस्फोट भएको छ ।

ब्रसेल्सको जावेन्टम विमानस्थलमा बम विस्फोट भएको बेल्जियमका सरकारी अधिकारीले बताएका छन् । विस्फोटमा केही मानिसको ज्यान गएको बेल्जियमको सरकारले पुष्टी गरेको छ । तर कति जनाको ज्यान गएको छ भन्ने बारेमा भने केही जानकारी दिएको छैन । विस्फोटको कारण खुलेको छैन । विस्फोट लगतै विमानस्थल खाली गराइएको छ भने सुरक्षा व्यवस्था पनि कडा पारिएको छ ।

गएको नोभेम्बर १३ मा फ्रान्सको राजधानी पेरिसमा एक सय ३० जनाको ज्यान जानेगरी भएको आतंककारी आक्रमणका प्रमुख आक्रमणकारी सालह अब्देसलाम ब्रसेल्सबाट पक्राउ परेको चार दिनपछि विमानस्थलमा विस्फोट भएको हो । विमानस्थलमा अरु पनि बम हुन सक्ने आशंकामा खोजी भइरहेको बिबिसीले जनाएको छ । विस्फोटपछि विमानस्थलबाट गरिने सबै उडान रद्द गरिएको छ ।