प्रधानमन्त्री ओलीको चीन भ्रमण आजबाट

७ चैत, धादिङ – प्रधानमन्त्री केपी शर्मा ओली ८ दिने औपचारिक चीन भ्रमणका लागि आइतबार त्यसतर्फ प्रस्थान गर्दै छन्। चिनियाँ प्रधानमन्त्री ली खछयाङको निमन्त्रणामा चैत ७ देखि १४ गतेसम्म चीन भ्रमण गर्ने कार्यक्रम रहेको छ ।

प्रधानमन्त्री ओली जम्बो नेपाली प्रतिनिधिमण्डलको नेतृत्व गर्दै आइतबार हिमालयन एयरलाइन्सको विमानमार्फत बेइजिङ प्रस्थान गर्ने कार्यक्रम रहेको छ।

भ्रमण टोलीमा प्रधानमन्त्री ओलीसँगै उनकी धर्मपत्नी राधिका शाक्य, उपप्रधानमन्त्री एवम् परराष्ट्रमन्त्री कमल थापा, अर्थमन्त्री विष्णु पौडेल, वाणिज्यमन्त्री दीपक बोहोरा, शिक्षामन्त्री गिरिराजमणि पोखरेल, प्रधानमन्त्रीका प्रमुख सल्लाहकार विष्णु रिमाल, व्यवस्थापिका–संसद्का सदस्य, मुख्यसचिव, विभिन्न मन्त्रालयका सचिव, उद्योगी–व्यापारी र केही पत्रकार रहेकोे परराष्ट्र मन्त्रालयले जनाएको छ।

चीन भ्रमणका क्रममा प्रधानमन्त्री ओलीले चिनियाँ राष्ट्रपति सी जिनपिङसँग शिष्टाचार भेटवार्ता गर्ने छन्। प्रधानमन्त्री ओली चीनको जनबृहत् प्रेक्षालयमा आयोजना हुने स्वागत समारोहमा चैत ८ गते सरिक हुने छन्। त्यसपछि उनले आफ्ना समकक्षी लीसँग भेटवार्ता गर्नेछन्। लीसँगको औपचारिक वार्तापछि दुई देशवीच द्विपक्षीय सम्झौता र समझदारीपत्रमा हस्ताक्षर हुने छ।