एसएलसी परीक्षाको तयारी अन्तिम चरणमा

१९ फागुन, धादिङ – यस वर्षको प्रवेशिका परीक्षा एसएलसीको तयारी अन्तिम चरणमा पुगेको परीक्षा नियन्त्रण कार्यालय सानोठिमीले जनाएको छ ।

कार्यालय अन्तर्गतको परीक्षा शाखाका उपनियन्त्रक अनुपमचन्द्र श्रेष्ठका अनुसार पश्चिम क्षेत्रमा आवश्यक प्रश्नपत्र पठाइसकिएको छ ।

पूर्वमा पनि केही दिनमा लैजाने तयारी भइरहेको छ । एसएलसीमा सहभागी हुने विद्यार्थीलाई आफ्नो विवरण गलत भए सच्याउन दिने मेमो कार्ड पनि सँगै पठाइएको उहाँले बताउनुभयो ।
मेमो कार्ड र विद्यार्थीको फारममा नाम, थर, जन्म मिति, सिम्बोल नम्बर लगायतका कुरा फरक भए १५ दिनभित्र सच्याउन सकिनेछ ।

आउँदो चैत १८ देखि २९ गतेसम्म चल्ने एसएलसी परीक्षामा ६ लाख भन्दामाथि विद्यार्थी सामेल हुने छन् । देशभर १९ सय ४३ परीक्षा केन्द्र निर्धारण गरिएको केन्द्रले जनाएको छ ।