बंगलादेशद्धारा युएई ५१ रनले पराजित

१५ फागुन, धादिङ – एसिया कप क्रिकेट अन्तर्गत शुक्रबार राति भएको खेलमा आयोजक बंगलादेश विजयी भएको छ ।

मिरपुरमा भएको खेलमा बंगलादेशले संयुक्त अरब इमिरेट्स युएईलाई ५१ रनले हराएको हो । एक सय ३४ रनको लक्ष्य पछ्याएको युएईले १७ दशमलव ४ ओभरमा सबै विकेट गुमाएर ८२ रन मात्रै बनाउन सक्यो । युएईका मुहम्मद उस्मानले ३०, रोहन मुस्तफाले १८ तथा मोहम्मद शाहजादले १२ रन बनाउनु बाहेक अरु ब्याट्सम्यानले दोहोरो अंकमा रन बनाउन सकेनन् ।

बंगलादेशका मुस्ताफिजुर रहमान, मसराफे मोर्तजा, शाकिव अल हसन र महमुदुल्लाहले समान दुई दुई विकेट लिए । यस्तै तस्किन अहमद र अल अमिन होसैनले एक एक विकेट लिए । यसअघि पहिले ब्याटिङ गरेको बंगलादेशले निर्धारित २० ओभरमा ८ विकेट गुमाएर एक सय ३३ रन बनायो । उसका लागि मोहम्मद मिथुनले ४७, महमुदुल्लाहले नटआउट ३६ तथा सोयुम्य सरकारले २१ रन बनाए । युएईका मोहम्मद नावेदल र अम्जाद जावेदले समान दुई दुई विकेट लिए ।