म्यानचेस्टर सिटीलाई ५–१ ले हराउदै चेल्सी क्वाटरफाइनलमा

१० फागुन, धादिङ – चेल्सी एफए कप फुटबलको क्वाटरफाइनलमा प्रवेश गरेको छ । आइतबार राति भएको खेलमा म्यानचेस्टर सिटीलाई ५–१ ले हराएर चेल्सीले क्वाटरफाइनलमा स्थान बनाएको हो ।

युवा खेलाडीले भरिएको म्यानचेस्टर सिटीलाई दबाबमा राखेको चेल्सीका लागि ३५ औं मिनेटमा डिएगो कोस्टाले गोल गर्दै सुरुवाती अग्रता दिलाए । तर त्यसको दुई मिनेटपछि नै सिटीका डेविड फउपालाले बराबरी गोल फर्काए । पहिलो हाफमा १–१ को बराबरी भएको खेलमा ४८ औं मिनेटमा विलियनले गोल गर्दै चेल्सीलाई २–१ को अग्रता दिलाए ।

५३ औं मिनेटमा ग्यारी केहिल तथा ६७ औं मिनेटमा इडेन हेजाडले गोल गरेपछि चेल्सीको अग्रता ४–१ मा पुग्यो । ८९ औं मिनेटमा बट्रेन्ड ट्राउरेले गोल गरेपछि चेल्सी ५–१ ले विजयी भयो । यस्तै आइतबार राति नै भएको खेलमा ब्ल्याकबर्नलाई ५–१ ले नै हराएको वेष्ट ह्याम तथा टोटनह्यामलाई १–० ले हराएको क्रिष्टल प्यालेस पनि क्वाटरफाइनलमा प्रवेश गरेका छन् ।