म्यानचेष्टर सिटी विजयी, आर्सनल बराबरीमा रोकियो

२० माघ, काठमाडौं । इंग्लिस प्रिमियर लिग फुटबलमा उपाधिको दाबेदार लिसेस्टरसँगै म्यानचेष्टर सिटी विजयी हुँदा आर्सनल भने बराबरीमा रोकिएको छ ।

मंगलबार राति भएको खेलमा म्यानचेष्टर सिटी सण्डरल्याण्डलाई १-० गोल अन्तरले पराजित गरेको छ । उसका लागि निर्णायक गोल सर्जिओ एग्युरोले गरे ।

सण्डरल्याण्डको घरेलु मैदानमा भएको खेलमा एग्युरोले १६ औं मिनेटमा गोल गरेका थिए । त्यही गोल निर्णायक बन्यो ।

अर्को खेलमा आर्सनल भने साउथ हृयाम्पटनसँग गोलरहित बराबरीमा रोकिएको छ । खेलमा आर्सनलले गोल गर्ने केही राम्रा मौकाहरु पाएको थियो तर, सदुपयोग गर्न सकेन ।

बराबरीसँगै आर्सनलको उपाधि होड केही कठिन भएको छ । लिग लिडर लिसेस्टरभन्दा ५ अंकले पछि परेको छ ।

अर्को खेलमा टोटनहृयामले नरभिचलाई ३-० ले हराएको छ । र, गोल अन्तरका आधारमा आर्सनललाई जितेको छ । लिग लिडर लिसेस्टर २४ खेलबाट ५० अंकसहित शीर्ष स्थानमा छ भने सिटीको ४७ अंक छ ।