मोरिन्होको बर्खास्तीपछि हिड्डिंक चेल्सीको प्रशिक्षक बन्ने

पुस ४, काठमाण्डौं – धादिङ- इंग्लिस फुटबल क्लव चेल्सीले नेदरल्याण्ड्सका पूर्व प्रशिक्षक ६९ वर्षे गुस हिड्डिंकलाई अन्तरिम प्रशिक्षक बनाउने भएको छ । इंग्लिस प्रिमियर लिगमा लगातार खराव प्रदर्शन गर्दै आएको चेल्सीले शुक्रबार प्रशिक्षक जोसे मोरिन्होलाई बर्खास्त गरेको थियो ।

२ वर्षअघि दोश्रो पटक चेल्सी आएका मोरिन्होले गएको सिजनमा चेल्सीलाई प्रिमियर लिग जिताएका थिए । उनी बर्खास्त भएपछि चेल्सीले कुराकानीका लागि हिड्डिंक लण्डन बोलाएको छ र उनी अहिले लण्डन पुगेका छन् । यसअघि पनि सन् २००९ मा चेल्सीको प्रशिक्षक भइसकेका हिड्डिंकले चेल्सीसँग सम्झौता गर्न बाँकी छ । सन् २००९ मा हिड्डिंकै प्रशिक्षणमा चेल्सीले एफए कप जितेको थियो । १६ औं चरणका खेल सकिँदासम्म ९ खेल हारेको चेल्सी अहिले प्रिमियर लिग अंक तालिकाको १६ औं स्थानमा छ ।

६ महिना अघि नेदरल्याण्ड्स छाडेका हिड्डिंकसित टर्की, रसिया, अष्ट्रेलिया र दक्षिण कोरियाको राष्ट्रिय टिमलाई पनि प्रशिक्षण दिएको अनुभव छ । उनले १५ वर्षअघि स्पेनिस क्लव रियल म्याड्रिडलाई पनि प्रशिक्षण दिएका थिए । उनकै प्रशिक्षणमा डच क्लव पिएसभी इन्डोभेनलाई ६ पटक डच लिगको उपाधि जिताएका थिए ।