नेपालले आज बंगलादेशसँग खेल्ने

२ पुस, काठमाडौं– साफ च्याम्पियनसिप फुटबलको तयारीमा रहेको नेपालले बिहीबार बंगलादेशसँग मैत्रीपूर्ण खेल खेल्ने छ । मैत्रीपूर्ण खेल तथा तयारीका लागि बंगलादेश पुगेको नेपाली टोलीले ढाकामा घरेलु टोलीसँग प्रतिस्पर्धा गर्नेछ ।

नेपाल र बंगलादेशबिचको मैत्रिपूर्ण खेल ढाकाको बंगाबन्धु रंगशालमा नेपाली समय अनुसार बेलुका पौने पाँच बजे सुरु हुनेछ । पुस ८ देखि १९ गतेसम्म भारतको केरलामा हुने साफ च्याम्पियनसिपको अन्तिम तयारीमा हरेका दुवै टिमले मैत्रिपूर्ण खेल तयारीका लागि महत्वपूर्ण हुने जनाएका छन् ।

नेपाली टिमका मुख्य प्रशिक्षक प्याट्रिक एजुम्सले यो खेल दुवै टिमको तयारीका लागि निकै फलदायी हुने बताएका छन् । नेपाली टोली दुई महिनादेखि प्रतियोगिताका लागि प्रशिक्षणमा जुटेको थियो ।

नेपाली राष्ट्रिय टिमका कप्तान अनिल गुरुङले अभ्यास खेल दुवै टिमका खेलाडीका लागि फाइदाजनक हुने बताए । मैत्रिपूर्ण खेलले साफमा हुन सक्ने गल्ती सुधार गर्ने मौका दिने कप्तान गुरुङले बताए ।

दक्षिण एसियाका सात देश सहभागी रहेको साफ च्याम्पियनसिपमा समुह ए मा रहेको नेपालले पहिलो खेलमा पुस ८ गते श्रीलंकासँग खेल्ने छ । यस्तै दोस्रो खेलमा पुस १२ गते भारतसँग खेल्नेछ । समुहको शीर्ष दुई मा पर्न सके नेपाल प्रतियोगिताको सेमिफाइनलमा पुग्ने छ ।

बंगलादेश रहेको समुह बी मा अफगानिस्तान, माल्दिभ्स र भुटान छन् । प्रतियोगिताको अन्तिम तयारीका लागि बंगलादेश गएको नेपाली टिम त्यतैबाट भारतको केलरा जानेछ ।